Македонска кујна

Переци – Кога среќата би имала облик

Нов рецепт од Што со брашното тимот

Переци - превземено од Што со брашното
Views
Везилка Магазин

Уште еден одличен рецепт на Што со брашното тимот кој ви го пренесуваме во целост, зошто овие текстови едноставно – не се прераскажуваат.


Да ти кажам право, переците се мистерија.
Дали знаеш некој, кој со сигурност ќе ти каже, дека ги разбира переците?
Тоа е едно искрено и едноставно пециво, со комплициран дел.
Е, баш тој комплициран дел, всушност го прави перекот, перек.

Постои една теорија дека се направени во облик на прекрстени раце, а постои и друга теорија која вика дека во нив се крие тајната на вонземјаните и нивните цивилизации, квадратурата на кругот и конечниот број ПИ.

Ако мене ме прашуваш, переците се како луѓе. Сите сакаат да бидат сфатени, сакани и едноставни, но секој си има некој чвор.

Переците, поради некоја причина, во секунда го поправаат расположението. Ако не си се смеел долго, направи переци. Ако паѓа дожд, а тебе ти се сака сонце, направи переци.

Можеби нема да ги откриеш тајните на универзумот или квадратурата на кругот, но од рерната, заедно со переците, ќе извадиш и малку радост.
Никој не е сосема сигурен зашто. Можеби поради чашката ракија додадена во тестото, а можеби и затоа што наизглед комплицираните переци не враќаат во некое поедноставно време.

Состојки:

  • Брашно 250гр.
  • Вода 150гр. млака
  • Сол 1 лажичка
  • Путер мек 1 лажица
  • Сув квасец 1 лажичка
  • 1 ½ лажичка темен кафеав шеќер
  • Ракија 60мл. (30 мл. за переците и 30 мл. за шефот)
  • Kрупна морска сол
  • Mортадела 200гр.
  • Kрем-сирење 300гр.
  • Сода 1кг.
  • Зејтин 1л.
  • 3 Јајца

Подготовка:

  1. Ги ставаш шеќерот и квасецот во вода. Мешаш со жица да се растопи шеќерот. Оставаш 5 минути да се развие квасецот. Квасецот е среќен.
  2. Во длабок сад за месење го сипуваш брашното, солта, путерот и се мешаш со рака. Лева или десна, по желба. Во центарот правиш дупка и додаваш вода во квасецот и шеќерот, а од страна покриваш со брашно. Отстојува 30-тина минути.
  3. Потоа се замесува меко тесто. Меко како душа. Месиш околу 10 минути.
  4. По месењето, тестото се остава да стасува во стаклен сад покриен со стреч фолија. Откога ќе стаса, го истиснуваш насобраниот воздухот. Да издише.
  5. Го делиш топчето на 4 еднакви делови. Ги покриваш со влажна крпа.
  6. Ролаш 4 долги “црви” од околу 30-тина сантиметри и ги оставаш да одморат под крпата.
  7. Потоа ги досукуваш, и правиш уште подолги “црви” од 50-60 сантиметри. Ја потпевнуваш “Не се бели Маре мори, не се црви…”.
  8. Ги “плетеш” переците и ги ставаш на тепсија. Ги покриваш со големи најлони и оставаш да растат околу 45 минути.
  9. Потоа одат во замрзнувч да се замрзнат околу 2 часа. Минимум е 30 минути, а може да одат и на целовечерна.
  10. Во тенџере подготвуваш 1,5л. вода со 1/3 од шолја сода и чекаш да зоврие.
  11. На смрзнатите переци од фрижидерот, им приредуваш изненадување. Секој перек го спушташ со француска лажица во зовриената сода вода, и повторно назад на плехот. Така збунети, смрзнати па провриени, ги премачкуваш со жолчка од јајце и наросуваш со крупна морска сол
  12. Се печат 12-15 минути на 200 степени без вентилатор.
  13. Се мислиш зашто не подготви 8 перека, туку само 4.
  14. Одбираш еден ил’ два, ги сечеш на половина, мачкаш со крем сир и редиш мортадела.
  15. Ти си сега среќна личност!

 

Везилка Магазин

Напишете коментар