„За да го видиш светот не ти требаат многу пари, само желба и отворен ум.“
Ова е теза на 22 годишниот студент по фармација, Кристијан Топалов. На листата посетени држави има повеќе отколку што брои години. Роден е во Кочани, но „искинал“ многу чифта чевли низ светските метрополи. Љубов му е хемијата, идна професија фармацијата, желба-да го прошета светот. Меѓу две сесии купува билет за да види ново место. Немирен е и неуморен. Вели дека ја користи секоја шанса за да си ја почасти душата со нова дестинација.
Десетките во индекс му ја олеснуваат работата. Моментално живее и студира во Љубљана, но не уште долго.
Велат, светот е на младите, а нивниот дух е неуморен. Во оваа реченица целосно те пронаоѓам тебе. Моментално си во Словенија каде што студираш на фармацевтскиот факултет. Како го направи изборот и дали остануваш таму?
– Амбицијата и желбата за осознавање и продлабочување на својот личен и професионален живот е мојата движечка сила. Целта која си ја имам поставено и конкретните планови кои ги имам зацртано ме донесоа до тоа што сум и каде сум.
Во моментот ги довршувам моите магистерски студии на Факултетот за фармација во Љубљана, каде во меѓувреме работам на себе си за да се здобијам со вештини и разни искуства кои ќе ми помогнат во остварување на целта. Но секако сето тоа ќе ми овозможи чувство на задоволство и уживање во процесот и патот е долг и возбудлив, но сепак тоа за мене е многу важно можеби и поважно од самата крајна цел. Бидејќи сум во процес на запознавање на оваа околина и нејзините можности, се уште е рано за заклучоци дали би останал, иако се гледам себе во друга држава.
Колку се ценети нашите студенти во другите земји?
– Мое лично размислување е дека сме ценети. Трудот што го вложуваме, мотивацијата што ја имаме и замислата да си докажеме дека себеси дека вредеме и дека можеме, се пресудните карактеристики со кои се истакнуваме во новите општества. А сите знаеме дека различностите привлекуваат внимание на луѓето во околината, кои ги забележуваат позитивните атрибути во нас и вреднуваат и во исто време истакнуваат.
Како активен и успешен студент постојано патуваш. Кое е местото кое те воодушевило, а кое место тотално те разочарало?
– Моите досегашни патувања биле од различен карактер низ многу држави низ Европа. Секое место било свое и на посебен начин ме има маѓепсано или променето како личност.
Почнувајки од големите бродови кои пловат во Босфорот- кои се дел од градскиот сообраќај во огромниот Истанбул, преку големата еколошка свест во Гетеборг со седумте различни корипи за отпадоци во хостелот, па се до уникатниот и луксузен стил во Монако. Од бизнис темпото на живеење во Франкфурт, до смирениот и хармонизиран стил низ старите сокаци во Призрен, па и спортскиот дух на повозрасниот народ низ зелената Словенија.
За разочарувања, не би можел да се сетам, бидејќи сум научен дека сите функционираме различно и не можат да се вклопат во мојата слика на перфектност. Но можам да кажам дека големо разочарување за мене е кога ќе слушнам различни стеротипи и дискриминации за различни места од луѓе кои не ги посетиле лично.
За да патуваш-треба многу пари, такво е генералното мислење. Дали навистина се потребни многу пари за еден студент да патува низ светот?
– Се согласувам со луѓето кои велат, доколку посакаш нешто- секогаш постои можност да го добиеш. Можностите во денешно време се огромни и само чекаат на нас да бидат искористени. Доволно е само да искрено да посакуваш, до мера каде нема да имаш изговори кои ќе те оттуѓуваат од замислата и само така ќе ја најдеш можноста.
Постојат различни фондови кои даваат стипендии, безброј програми и организации кои овозможуваат исполнувајќи ги своите замисли или унапредувајќи ги своите таленти, а истовремено и да патуваш.
Кое место ти е неостварена желба?
– Дубаи. Местото кое ме асоцира дека нешто мало, заборавено од народот и лудите планови можат да вредат многу за светот, доколку се има доволно знаење, замисла и се искористуваат твоите капацитети заедно со поддршката од вистинските луѓе. Туристички град на плажа, исполнет со архитектонски предизвици и безброј иновативни активности и атракции за забава и секако дозата на културата од блискиот Исток, се работите кои ја дополнуваат причината зошто сакам да го посетам.
Крие ли Кочани твое тајно место? Каде се навраќаш постојано?
– Душевен мир, спокој и среќа се зборовите кои го опишуваат моето родно место Кочани, секој момент кога сум таму. Сплотеноста на семејството, роднините и пријателите се една од главните причини, но и безбројните моменти и спомени кои ги имам доживеано на тоа тло. Брана Градче е местото на кое би се навраќал, бидејќи ми овозможува многу, иако недалеку од градот.
Релаксирање од напорното секојдневие, возење на мојот велосипед, дружење и навраќање на она основното, дека сме дел и припаѓаме на природата.
Фармацијата е твојата професионална определба. Имаш ли идеја каде би останал да живееш?
– Моментално би сакал тоа да биде Швајцарија , во некој од поголемите индустриски центри каде би се надоградувал себеси. Но сепак би сакал да ги видам и истражам другите континенти, како Азија и Северна Америка, за да би знаел кое би било најдобар избор за мене и мојата иднина.
