РепортажиСвет

Сан Франциско – светската луда железница

Репортажа на Катерина Топалова

Views
Везилка Магазин

Патувањата се најдобрата инвестиција. Секое место има посебен жар, но од сите, само едно останува врежано во спомените како најмагично.

Ова е репортажа за најлудото место во светот. Со првото стапнување на негово тло, те вози како низ луда железница. Спој од брзина и височина, сплет на бои и класни слоеви. Понуда на се што може и не може да се замисли.

Во Сан Франциско, доволно е само да се вклучи камера, без никаков план, сценарио или монтажа, од секој агол, излегува филм. Не е чудно што претставува инспирација за големи режисерски имиња. Вториот град по густина на жители во САД е најнеамеричкото место кое се вгнездило на овој континент.

Сан Франциско е четвртиот најголем град во Калифорнија и четиринаесетиот најголем во САД. Во 1776, Шпанците биле првите Европејци што го населиле Сан Франциско. Тие основале мисија и ја нарекле според Францис од Асиси. По започнувањето на златната треска во 1848, градот започнал период на брз развој.

фото: Катерина Топалова

По катастрофалниот земјотрес и пожар во 1906, Сан Франциско бил брзо реконструиран и денес е еден од најпрепознатливите градови во светот.

Познат е по маглата, стрмните ридови, мешавината на викторијанска и модерна архитектура и по локацијата на полуостров заокружен со Тихиот Океан и Заливот на Сан Франциско. Меѓу најпрочуените делови на градот се вклучуваат мостот на Златната Капија, Алкатраз, кабелските автомобили, пирамидата на Трансамерика и кинеската четврт.

фото: Катерина Топалова

Историскиот центар на Сан Франциско се протега од северно-источниот квадрант на градот се` до улицата Маркет на југ. Тука се наоѓаат Финансиската Четврт и Јунион Плоштадот којшто претставува туристички, хотелиерски и шопинг центар на градот.

Кабелските автомобили се атрактивни за туристите но и за жителите во овој град. Ретро стилот е доживување уште пред да се качите во возилото, а самата моќ да се вози на стрмните улици е еднакво на чувството кога се возите на луда железница. Истите кабелски автомобили се користат за спуштање кон Рибарскиот Мол кој во минатото бил користен за прикотвување на рибарските бродови а денес претставува голема туристичка атракција и центар на збиднување.

фото: Катерина Топалова

Во истиот квадрант се наоѓаат и Рускиот Рид со светски-познатата крива улица Ломбард, Северната Плажа која е Сан Франциско верзија на Мала Италија, и Телеграф Ридот каде што се наоѓа Коит Кулата изградена во спомен на пожарникарите на Сан Франциско. Во близина се наоѓа и светски познатата Кинеска Четврт која била формирана уште во 1860-тите. Тендерлојн е населба која што многумина ја сметаат за една од населбите со највисока стапка на криминал.

Хејт-Ешбури сѐ уште има боемски карактер.

Кастро е центар на хомосексуалниот живот во градот и е препороден откако епидемијата на СИДА се стави под контрола.

фото: Катерина Топалова

Океанската Плажа се наоѓа на страната на Тихиот Океан, додека Плажата Бејкер се наоѓа на живописна локација веднаш на запад од Мостот на Златната Капија. И двете плажи не се соодветни за пливање бидејќи водата е студена а струите можат да бидат смртоносни.

Најголемиот и најпознат парк е Паркот на Златната Капија кој се простира од географскиот центар на градот, па се до океанот. Пред да постане парк, истата област се состоела од малку трева и многу песок. Денес, паркот е посаден со илјадници дрва и растенија донесени од други краишта. Во паркот се наоѓаат и атракции како Стакларникот за Цвеќиња, Јапонската Чајна Градина и Ботаничката Градина.

Президио, бивша воена база, и Криси Полето се дел од Националната Рекреативна Област на Златната Капија. Во истата област припаѓаат и островот Алкатраз и други оближни регионални паркови. Паркот Буена Виста е најстариот парк во градот и бил оформен уште во 1867 година. Мерсед Езерото е слатководно езеро кое е опкружено со парк.

фото: Катерина Топалова

 

Везилка Магазин

Напишете коментар