Ако никогаш не сте слушнале за George Georgievski, тогаш сте го пропуштиле едниот од најшармантните и чудесни Македонци низ светот, кој стекна светска слава со својот бренд School Lunch Box, правејќи школски оброци за своите две ќерки Кики и Анела, промовирајќи ја Македонија и нашите традиционални јадења на сите континенти.
Џорџ е роден и израснат во Geelong, Викторија, од мајка и татко Македонци. Растен во традиционална македонска куќа и кујна, своите корени ги носи со себе и ги вткајува во се` што прави, па така, во втората негова книга (*првата беше издадена во јуни, 2019 година) рецептите ќе се во голем процент инспирирани од нашата кујна.
Џорџ е и амбасадор за Џејми Оливер во Австралија, а во интервјуто за Везилка ни раскажа како се` започна, каков му е животот сега, и како кажувањето „НЕ“ на се` она што не е во склад со неговите верувања му е основниот принцип по кој се води во животот и работата.
Џорџ, ти си многу популарен на социјалните мрежи со рецептите за школските оброци за Кики и Анела и имаш стотици илјади следбеници. American Express Magazine те круниса како „најинспиративниот креатор на ручек во светот“. Како се појави идејата да се стави сè на социјалните медиуми?
Се започна пред 5 години, јас до тогаш секогаш излегував од дома пред некој и воопшто да се разбуди, но едно утро не отидов на работа бидејќи бев болен од машки грип, и додека лежев во кревет, ги слушнав превирањата од кујната, па влетав да видам што се случува!
Се испостави дека тоа било нормална утринска појава во нашата куќа. Ја погледнав сопругата и ѝ реков дека не можам да ги гледам луѓето што толку многу ги сакам, во ваква хаотична состојба. Таа ми рече ако ги преземам ручеците, тоа ќе ги реши повеќето проблеми. Тоа беше моментот кога сè започна.
Почнав да ги праќам моите девојки со ручеци што ги создавав за нив, сите направени со љубов и допир на креативност. Еден ден моите девојки ми донесоа порака од учителката во која таа ми пиша дека овие ручеци треба да бидат ставени на Инстаграм, бидејќи тоа може да им помогне на другите родители, па така се роди мојот профил на Инстаграм.
Кажи ни малку за себе и твоите македонски корени….
Јас сум горд Македонец, роден сум во Австралија, но со сета чесност душата ми припаѓа на Македонија. Секој пат кога се враќам, душата ми се исполнува. Татко ми ме научи да читам и пишувам македонски, и секогаш ме тераше да одам во библиотека за да позајмувам книги за историјата, велејќи дека таа има многу верзии, но дека од мене зависи да ја пронајдам вистинската. Јас го направив тоа, затоа и сум горд Македонец.
Татко ми е роден во Битола, а мајка ми е од Кичево. Имам роднини низ цела Македонија, главно Кичево, Битола, Прилеп, Скопје и Струга.
Кое беше твоето омилено македонско јадење додека растеше, и колку нашата традиционална храна влијаеше на твојот начин на готвење денес?
Македонската храна можеби не е секогаш визуелно зачудувачка, но има душа. Обожавав да јадам типични оброци, како мешано месо на скара од јаглен и шопска салата со ладна мастика, но, колку повеќе стареам, толку повеќе ги ценам оброците како гравче тавче, полнети пиперки, ориз тава, бурек, мазник и др.
Потребно е време, и очигледно љубов, за овие јадења да се направат, а кога некоја храна доаѓа од место на љубов и душа, тоа не може да не е добро. Оттука поттекнува и причината зошто мојата креативност денес е заснована врз филозофијата на љубовта, и без тоа, не би била толку добра.
Јас денес ѝ должам сè за моето воспитување на македонската храна и култура.
Иако не се согласуваме со тоа, останува фактот дека мажите Македонци генерално не готват и не подготвуваат деца за на училиште. Дали некогаш си имал „проблем“ со некој од македонската заедница, да те обвинува дека можеби „не ја следиш традицијата“?
Животот е полн избори, мажите можат да се кријат зад традицијата, но од нас зависи да создадеме традиција која не содржи непочитување на жените.
Во моето домаќинство нема улоги на татко или мајка. Се вика родителство и тоа е она што го правиме, тоа не е улога од 50/50, тоа е 100/100 улога. Мојата прекрасна сопруга и јас и двајцата се впуштивме 100% во одгледувањето на нашите ќерки и управувањето со секојдневните обврски.
Основно човеково право за жените е да се третираат подеднакво. Не можам да замислам потешка работа од прво, да носам дете во себе 9 месеци, а потоа и целиот процес на раѓање, раните фази на хранење и доење, па 5-те години дома за воспитување на тој мал човек…
Сега би сакал да разјаснам уште неколку точки. Поентите што ги спомнав погоре се сите неплатени, не можете да земете боледување, тоа е работа од 168 часа неделно и нема платен годишен одмор. Ние како мажи треба да ѝ се поклонуваме на земјата на која одат нашите партнери, треба да сториме сé што е во наша моќ за нивната реализација како мајка да е најдобро можно патување.
Имам должност на моите две ќерки да им покажам, а не кажам, како треба да се однесуваме кон жените. За да бидам добар татко, прво треба да бидам добар сопруг.
Кое е најдоброто, а што најлошото нешто, што си го прочитал за себеси во весниците / списанијата ширум светот?
Најдоброто нешто што можам да го прочитам за мене е вистината. Сепак, најмногу сакам кога другите родители коментираат за тоа како биле инспирирани да создадат некои од моите рецепти и ручеци, што ми е тотално неверојатно. Исто така, сакам и кога изјавуваат дека сум помлад од што всушност сум хахаха.
Што се однесува до најлошото нешто, еден кинески весник објави дека причината зошто правам ручеци се должи на тоа што сопругата ме тепа и ме тера да готвам. Се надевам дека ниту една жена не доби инспирација да го стори истото хаххахаха
Претежно сè од напишаното е реално, иако понекогаш медиумите прават да сум нешто поголемо отколку што реално сум, зошто сепак, на крајот на денот, јас сум татко и сопруг, кој само ја изразува својата љубов отворено.
Ја објави својата прва книга пред 1 година и скоро привршуваш со пишување на втората. Првата содржеше рецепти за брзи ручеци, што е ново во втората?
Првата книга беше искуство за учење, меѓутоа издавачот неверојатно добро се справи со се, и тие ме водеа низ процесот, дозволувајќи ми ја својата креативна слобода. Сега сум во процес на пишување на втората книга и рецептите се продолжение на мојот раст како креатор на рецепти, но исто така ги внесувам и своите македонски корени – моја мисија е да помогнам во поставување на македонската храна и култура на светската мапа и го потенцирав тоа во мојата втора книга.
Ти секогаш велиш „Јас сум ТАТКО пред се, и без оглед на славата, секогаш ќе останам тоа“, но кој беше Џорџ пред School Lunch Box да доживее ваков успех?
Ок, јас отсекогаш сум бил креативен, многу време поминував во пишување песни, раскази и создавање музика на гитара, се занимавав со креативна уметност. Бев и сè уште сум активен борец за еднаквост и праведност. Порано, во слободно време читав за историја и поминав години студирајќи ја Кубанската револуција, бев во Франција неколку пати бидејќи ја сакам храната и културата. Уживав повеќе да читам, отколку да слушам, за фактичките настани што го дефинираа светот во кој живееме денес.
Имам многу тетоважи и поминав многу време на мојот Харли Дејвидсон, и не, не сум стандардниот стереотип кој би се очекувал од некој како мене, но давањето на неочекуваното на луѓето ми беше многу забавно.
Но, најважно за мене е што се обидов да бидам добра личност, секогаш излегував од својот пат да им помогнам на луѓето и мислам дека тоа беше квалитетот што ја освои мојата сопруга повеќе отколку мојот изглед хахаха
Во неодамнешното интервју за СБС, спомена дека не се плашиш да кажеш НЕ на ситуации, спонзори, настани и слично, доколку не се во согласност со твојата филозофија за здрава храна. Дали мислиш дека твојот успех во најголем дел се должи на фактот дека ти остануваш верен на себе и своите верувања и уверувања, појава многу ретка во денешно време?
Силата на зборот „НЕ“ е огромна. На вистински уметник не може да му биде кажано како да слика или како да дејствува, и какви четки треба да користи. Јас размислувам на прилично ист начин. Многу е важно да се остане на мисијата што ја наведов пред толку години, иако на моменти имаше искушенија да се „продадам“, но јас едноставно не можев да го сторам тоа. Мојот статус е изграден врз интегритет и доверба, и не би било мудро за мене да направам нешто со што ќе го загрозам тоа.
На пример, ми понудија пристојна сума пари за да промовирам „шеќерен“ бренд на производи, но откако ја открив количината на шеќер што ги имаа овие производи и штетата што може да им ја нанесе на нашите деца, едноставно морав да кажам Не. Секогаш останете верни на вашето верување, срцето има најдобар интерес за оние што ги сакаме.
Колку повеќе останувам верен на мојата мисија, толку повеќе продолжувам да растам.
Дали некогаш си бил во Македонија, и ако да, кое е местото што ти дава најголема радост?
Неколку пати сум бил во Македонија и уживав секој пат. Најмногу ме радува да седам во дворот на куќата на баба ми во Кичево, да јадам шопска салата и да пијам ладна мастика. Очигледно ја сакам природната убавина на Македонија, ги сакам убавите цркви во Охрид, како Плаошник и прекрасното езеро, го сакам корзото во Битола, но гостопримството на Македонците е она што за мене ја прави Македонија привлечна.
Најважната причина зошто Македонија е убава е заради луѓето, тоа е она што ми недостасува најмногу.
