Животот знае да даде шанса и да отвори дилема – што понатаму? Каде да се продолжи? Такво чувство имал и младиот Костадин Несторов од Скопје кога семејството го натерало да замине преку барата.
„На аеродром во Сиднеј ме пречекаа мајка ми и сестра ми,беше наутро околу 5ч.Брат ми не можеше да дојде бидејќи имаше работа,а и не знаеше дека доаѓам беше мало изненадување хаха. Слетав на 23 Јуни 2017 и на 30ти Јуни после само 7 дена почнав да работам.Го срушив рекордот на сестра ми,она почна со работа после 9 дена од кога слета во Сиднеј,тоа ни беше како мало натпреварување“, вели Несторов.
Прва работа му била перење на автомобили. Работел пет дена од 9 до 17 часот. Ова траело се` додека не ги добил сите документи за престој во Австралија. Потоа размислувал дека би било добро да аплицира во синџирот на ресторани за пица – „Доминос“. Се замислувал како доставувач кој ќе им носи пица на гладните. Но животот за ова скромно момче имал друг план.
„На 1 април добив договор и понуда да бидам асистент менаџер од страна на тогашниот сопственик Томи Фостер од кој што научив многу во врска со бизнис воопшто и Доминос“, вели Костадин. Како млад и вреден менаџер имал многу шанси да ја смени работата, да се обиде да напредува, но одлучил да биде лојален и да ја гради професионално кариерата во куќата која му ја дала најголемата шанса.
„Во Доминос аплицирав на интернет и добив брз одговор за интервју. Отидов со позитивна мисла и си реков “Ќе се возам на скутер,ќе доставувам пици убаво ќе ми биде”. Ме имаат прашано и претходно, ама одговорот е секогаш ист – останав поради луѓето, а и самата работа.
Убаво ми е да ги едуцирам на некој начин тие што се дел од мојот тим што значи да работиш и заработуваш и зависиш самиот од себеси, а не од друг. Поради тимот и резултатите што ги достигнуваме. Поради тоа што од обичен доставувач на пица можеш да достигнеш до водач на смена, асистент менаџер, менаџер на продавница, регионален лидер, државен лидер, итн“.
Младиот скопјанец живее исто и во Сиднеј. Кога не е на работа се релаксира како и сите.
„Кога сум сам правам многу работи. Возам со велосипед, трчам, средувам низ дома, готвам, гледам филмови, спорт, слушам музика…“ вели Костадин.
Успехот и шансата која му ја дала Австралија не ја забоорава, но не ја заборава ниту земјата од која што доаѓа, каде што го земал првиот атом воздух и првиот зрак сонце.
„Го живеам денот целосно како што јас сакам, а не како мора да биде. Сепак, Македонија ја сакам, бидејќи тоа е мојот дом, имам многу недовршени работи таму, многу блиски луѓе и семејство“ завршува Костадин.
